पंतप्रधान भ्रष्टाचारी - ' टीम अण्णा '
Saturday, 26 May 2012|
Marathi Shayar
' टीम अण्णा ' चा थेट आरोप वृत्तसंस्था, नवी दिल्ली
पंतप्रधान डॉ. मनमोहनसिंग , अर्थमंत्री प्रणव मुखर्जी आणि गृहमंत्री पी. चिदंबरम यांच्यासह यूपीए सरकारमधील १५ मंत्री भ्रष्ट असल्याचे आरोप ' टीम अण्णा ' ने शनिवारी केले. ' टीम अण्णा ' ने यासंदर्भात तयार केलेल्या अहवालात १५ मंत्र्यांवर ठपका ठेवला असून , त्याचा तपास करण्यासाठी तीन निवृत्त न्यायाधीशांच्या विशेष चौकशी पथकाची नियुक्ती करावी , अशी मागणीही करण्यात आली आहे.
मंत्र्यांवरील भ्रष्टाचाराच्या आरोपांची चौकशी करण्यासाठी पंतप्रधानांना विशेष तपास समिती स्थापन करण्यासाठी पत्र लिहिले असल्याची माहिती ' टीम अण्णा ' चे सदस्य प्रशांत भूषण यांनी दिली. पंतप्रधान डॉ. मनमोहनसिंग यांच्या अखत्यारित २००६ ते २००९ या काळात कोळसा मंत्रालय असताना अत्यंत कमी दराने खाणींसाठी परवानगी देण्यात आली होती , असा आरोप या अहवालात करण्यात अला आहे. खाणकाम घोटाळ्यातील भ्रष्टाचाराचा उल्लेख महालेखापरिक्षकांच्या (कॅग) अहवालात करण्यात आला आहे , असेही भूषण यांनी सांगितले. त्याचप्रमाणे अर्थमंत्री प्रणव मुखर्जी यांच्याकडे संरक्षणमंत्रिपदाची जबाबदारी असताना त्यांनी पाणबुडीच्या व्यवहारात चार टक्के कमिशन घेतल्याचा तसेच , टूजी स्पेक्ट्रम वाटप गैरव्यवहार प्रकरणात गृहमंत्री पी. चिदंबरम हेही दोषी असल्याचा आरोप अहवालात केला आहे.
या यादीत पंतप्रधान डॉ. मनमोहनसिंग यांच्यासह पी. चिदंबरम , प्रणव मुखर्जी , शरद पवार , एस. एम. कृष्णा , कमलनाथ , प्रफुल पटेल , विलासराव देशमुख , वीरभद्र सिंग , कपिल सिब्बल , सलमान खुर्शिद , जी. के. वासन , फारुख अब्दुल्ला , एम. के. अळगिरी आणि सुशीलकुमार शिंदे यांचा समावेश आहे.
केजरीवालांवरील आरोपाचा बेदींचा इन्कार
' टीम अण्णा ' च्या सदस्यांमध्येच आता एका नव्या वादाला तोंड फुटले आहे. ' टीम अण्णा ' च्या सदस्या किरण बेदी यांनी अरविंद केजरीवाल यांच्या ' पब्लिक कॉज रिसर्च फाउंडेशन ' या स्वयंसेवी संस्थेवर निधीचा गैरवापर केल्याच्या आरोप केल्याचे वृत्त होते. मात्र आता बेदी यांनी याचा स्पष्ट शब्दांत इन्कार केला आहे. ' केजरीवाल यांच्या प्रामाणिकपणाबद्दल मी कधीही संशय व्यक्त केला नाही ,' असे त्यांनी सांगितले. तर केजरीवाल यांनीही त्यांच्यावरील आरोप निरर्थक असल्याचे म्हटले आहे.
Posted in
news
0 comments for this post
Leave a reply