जादू ओसरली!
Tuesday, 29 May 2012|
Marathi Shayarयंदाची आयपीएल स्पर्धा कोलकाता नाइट रायडर्सने जिंकून आयपीएलच्या चाहत्यांना सुखद धक्का दिला आहे. चेन्नई सुपर किंग्जच हा सामना जिंकेल आणि या स्पर्धेमध्ये सलग तिसर्यांदा विजय मिळविण्याचा पराक्रम करेल असा होरा होता. परंतु चेपॉकच्या मैदानावर नाणेफेक जिंकणे महत्त्वाचे होते. याचे कारण जो नाणेफेक जिंकून मोठी धावसंख्या उभारली की त्याचे अपरिहार्य दडपण प्रतिपक्षावर येणार हे उघड होते. शिवाय चेपॉकच्या खेळपट्टीवर मोठ्या धावसंख्येचा पाठलाग करणे सोपे नाही , असाच आजवरचा अनुभव असल्याने नाणेफेक जिंकणारा संघ फलंदाजीच घेणार आणि अधिकाधिक धावा तडकावण्याचा प्रयत्न करणार हे उघड होते. चेन्नईच्या ढोणीने नाणेफेक जिंकली आणि त्या संघाच्या खेळाडूंनी योजनापूर्वक खेळ करून धावांची बरसात करत १९० धावा केल्या. मायकेल हसी , मुरली विजय आणि सुरेश रैना यांनी धुंवाधार फलंदाजी करत आपल्या संघाच्या विजयासाठी आवश्यक ती मजबूत पायाभरणी केली आणि आयपीएलच्या आजवरच्या अंतिम सामन्यातील सर्वांत मोठी धावसंख्या उभी केली. ही धावसंख्या ओलांडणे कोलकाता संघाला कठीण जाणार , असाच सर्वांचा कयास होता. परंतु गौतम गंभीरच्या नेतृत्वाखाली खेळणार्या कोलकाता संघ या मोठ्या धावसंख्येखाली दबला गेला नाही. पहिल्याच षटकामध्ये संघाचा कर्णधार गंभीर माघारी परतल्यावरही त्या संघाचे मनोधैर्य कमी झाले नाही. उलट ऐनवेळी अंतिम सामन्यासाठी संघात निवड केलेल्या मनविंदर बिसला याने जॅक कॅलिससह तडाखेबंद खेळ करत १३६ धावांची भागिदारी केली आणि तिथेच सामन्याचा निकाल काय लागणार याची कल्पना जाणत्यांना आली. चेन्नईची धावसंख्या , त्या संघाचा कर्णधार ढोणी याने आपले सारे कसब पणाला लावत केलेली व्यूहरचना आणि त्यातून प्रतिपक्षावर वाढवत नेलेले मानसिक दडपण यापैकी कशालाही न जुमानता कोलकाता संघाच्या खेळाडूंनी विजय खेचून आणला. चेन्नईच्या संघाच्या विजयाच्या हॅटट्रिकचे स्वप्न त्यांनी उधळून टाकले. हे श्रेय निश्चितपणे गौतम गंभीरच्या नेतृत्वाचे आणि त्यानी आपल्या खेळाडूंमध्ये निर्माण केलेल्या जिद्दीचे. शेवटी कोणत्याही मोठ्या लढतीमध्ये बौद्धिक आणि मानसिक बळच महत्त्वाचे ठरत असते. त्यामुळेच प्रतिस्पर्धी कर्णधार परस्परांवर अधिकाधिक मानसिक दडपण आणण्याचा प्रयत्न करत असतात. त्यानुसार व्यूहरचना करत असतात. खेळाची शैलीही ठरवत असतात. अर्थात परिस्थितीनुसार आपल्या डावपेचात आणि खेळातही बदल करण्याची सजगताही कर्णधाराला दाखवावी लागते. त्यानुसार आपल्या संघातील खेळाडूंना विश्वासात घेऊन त्यांच्याशी विचारविनिमय करावा लागतो. कोलकाता संघाला मिळालेल्या यशामुळे त्या संघाचा कर्णधार गंभीर याने हे किती सफाईने केले असावे याचा अंदाज येतो. अखेरीस शेवट गोड ते सर्वच गोड असे म्हटले जाते. त्याप्रमाणे स्पॉटफिक्सिंग , खेळाडूंचे स्टिंग ऑपरेशन आणि काही संघमालकांचे बेशिस्त वर्तन यामुळे गाजलेल्या आयपीएलच्या यंदाच्या पर्वाची अखेर झाली आहे. शाहरुख खान याने आपल्या गैरवर्तनाबद्दल माफीही मागितली आहे. पुढच्या वर्षी स्थानिक खेळाडूंचाही समावेश लिलावात केला जाण्याची घोषणा करण्यात आली आहेच ; परंतु पाकिस्तानचे खेळाडूही पुढच्या आयपीएलमध्ये सहभागी असतील असेही सांगण्यात आले आहे. थोडक्यात , यंदाच्या आयपीएलची सांगता आशादायक झाली आहे. मात्र यंदाच्या स्पर्धेला सुरुवातीपासून प्रेक्षकांचा मिळालेला प्रतिसाद फारसा उत्साहवर्धक नव्हता. या स्पर्धा सुरू झाल्या , तेव्हा त्यांचे वेळापत्रक बघून नवे चित्रपट प्रदर्शित करण्याच्या तारखा ठरवल्या जात. यंदा तसे घडले नाही , ही बाब बोलकी आहे. असे का घडते आहे , त्याचा विचार संयोजकांनी करावयास हवा. दुसरे असे की अनेक सामन्यांचे निकाल हे शेवटच्या दोन-तीन षटकांमध्ये लागण्याचा ' योगायोग ' अनेकवेळा अनुभवास आला. आयपीएलमधील खेळाडूंच्या धुंवाधार खेळाचे कौतुक समालोचन करणाऱ्यांनी करणे हा त्यांच्या कामाचा भाग मानला , तर तंत्रशुद्ध फलंदाजीसाठी किंवा अचूक गोलंदाजीसाठी प्रसिद्ध असलेल्या कोणाही अन्य खेळाडूंनी या सामन्यांबाबत मुग्धताच पाळली. थोडक्यात , आयपीएलची पहिल्या वर्षाची जादू यंदा बऱ्याच प्रमाणात ओसरल्याचे अनुभवास आले. या साऱ्याचा विचार संयोजकांनी केला आणि आयपीएलच्या सामन्यांच्या नियमांत काही बदल केले तरच या हाणामारीच्या आणि ' सभ्य माणसांचा ' म्हणून ओळखल्या जाणार्या खेळाला सर्कसच्या पातळीवर आणणार्या या सामन्यांकडे प्रेक्षक मोठ्या संख्येने वळतील. अन्यथा हे सामने त्या-त्या मालकांचे पाठिराखे , चाहते आणि बगलबच्चे यांच्यापुरतेच राहतील
Posted in
Sport News
0 comments for this post
Leave a reply